育兒7個月

報告一下囡囡情況先

體重：有9kg，即係19.8磅 (用屋企個磅，個數可能有偏差)

主餐：媽媽奶，但自己係星期六病左，無拉拉發燒，醫生開左抗生素比我，咁要迫住餵奶粉，平均3.5-4個鐘一次，每次約4安，最多5安

次餐：每天一次粥仔或米糊，但份量唔多，主要煲瘦肉粥，試過魚粥，唔太肯食

水量：間唔時都會比佢飲，尤其食了粥或糊仔

生果：通常都係橙，因家裡主要買既都係橙

活動：手仔可以做一個BYE BYE動作，有時自己同自己玩BYE都可以笑一餐

牙仔：都係出左下面2隻，停滯左係度，成日發牙痕，見乜咬乜

發音：成日係度講野，但大家都唔知佢講乜，聲線都好大下架

學習：可以360度轉身，用腳去轉，但仲未識爬，撐住佢時企得都穩

                     

不知不覺，又7個月了，時間過得好快，感受昕晴越大越識扭計，越大越黐身，好似好無安全感，放佢係車或床，一定要睇到實，一行開佢就喊或大叫

但一同佢玩，佢就好有反應，笑到甜一甜，仲成日玩口水波tim，不過真係好體力透支架，佢瞓既時間越黎越少，咁我就要陪佢係度玩，都咪話唔累

現在得閒既時候會上網搵幼稚園資料，暫時見到救世軍、浸信會、禮賢會(一條龍升埋小學)都好似OK，發覺新一代既媽咪唔易做，同我地個陣時比，現在要為小朋友預備好多野，可能身邊環繞住既父母都會為子女咁做，有時都感到有壓迫感架

BUT，我自己會本住，只要我個小朋友身體健康、無病無痛、聽教聽話，叻唔叻已經係其次，只要唔學壞，做阿媽既已經無乜要求

有時諗，真係唔知點樣做個好父母，但，我知道，只要我用心，盡心盡力去教佢，已經無愧於心

同埋我會依靠主去面對，因真係唔知點管教，但我信任神的帶領

                     

題外話：

好開心，新一期既公屋調遷已經有，我地終於可以合適申請，現在我地既要求，新唔新已經唔重要，最重要既係大同埋方便，有諗過，如果可以搬番近阿媽既話就好啦

有時我真係怕，如果搬左屋，24小時唔止對住昕晴，仲要對住99，都擔心過自己會屈到病，但如果近阿媽，到時有乜都可以求救，哈哈，可能誇張左，因為I LOVE MY MAMMY，我比較黐娘家 ^^

我部G10唔知乜原因，比我搞到SHORT左，要攞去整，所以無相POST呀 >.<