朱古力暖心蛋糕(心太軟)

朱古力暖心蛋糕(心太軟)，特價班$138

Aroma'So Baking   http://aromaso.com/ 

焗爐以150度預熱

朱古力軟心做法：

首先將黑朱古力64%(溶) 50g + 牛油(軟)15g拌勻，再將淡忌廉25g + 鮮奶25g分兩次加入，第二次連同橙酒5g一同倒入拌勻，備用

另將少許牛油於室溫至軟身，塗抹於4個蛋糕杯內，備用

外層朱古力蛋糕做法：

將黑朱古力64%(溶) 75g + 牛油(軟) 70g以打蛋機慢速拌勻，加入砂糖20g拌勻，再加入雞蛋1隻(約55g)拌勻後轉快速打至杰身，最後將低筋麵粉60g + 泡打粉1/3茶匙加入，以快速打至杰身即可

將外層朱古力蛋糕放唧袋內，唧於蛋糕杯底及邊，將朱古力軟心放在中央，再唧上朱古力蛋糕封口，記得唔好比朱古力蛋糕有窿窿出現，否則焗出黎既軟心就會流哂出黎

蛋糕以180度入爐，放底層，全程約焗15mins，至蛋糕面上色，再轉為只用底火，出爐後將蛋糕倒轉於碟上，配以生果及雪糕伴碟裝飾

今次休息時，阿sir將佢教我地整既心太軟每人比一份我地試食，你睇阿sir好有心機，將d心太軟襯番生果同雪糕，仲教我地，先一啖雪糕再一啖心太軟，well............so yummy，個個睇到d裝飾已經嘩嘩聲，阿sir仲話這個最好配既係雲尼拿雪糕

阿sir真係好有心機同肯花錢，這個係休息時既小食，都整到咁靚，等我地可以參考，將來整比人食，阿sir仲話，如果我地請朋友黎屋企，想整心太軟比人食既話，我地可以前一晚，將所有野整好哂，用保鮮盒封好入雪櫃，到朋友黎既時候，就取出，即焗即食，我估大家都可以用佢這個方法去招呼朋友，yeah

大合照，今次嘈小姐臨時有事，所以我叫了朋友仔一齊整，朋友仔都對阿sir讚不絕口，可惜佢想報既班，全部full哂，唯有等1月份有時間表，就即報啦