放監啦

從來無諗過，坐月係咁辛苦架，想做好多平時都做開既野，係咁難架，我係一個都幾唔聽話既人，所以要我成個月都唔可以做既野，心情確實好炆，都唔明點解生仔要STOP咁多野架，同埋D人煩到抽筋(我知佢地對我係好既)，乜都唔比唔可以，但我終於捱過左啦，真係超開心呀，好有放監既感覺呀！

不可沖涼 + 掂水

原來一個月，無得沖涼、洗頭、唔好掂水(就算要掂都係要熱水)，真係有難度，古人話，生完掂水，將來會風濕喎，所以好多人都話唔好掂，但我捱過左12朝，忍唔住就要洗一洗，但都係用薑水去沖洗，同埋D水係要熱到阿媽唔認得咁去沖，這一件係我坐月最深刻的一件事！

穿衣服

成日話唔可以比風吹親，所以在家都要長衫長褲，咁我當然唔聽話，只係開冷氣時先著番條長褲，因真係................夏天仲要長衫長褲係好難頂既一件事，仲要有日去健康院，撞到阿媽D FD，比佢地話叫我要著長袖，唔可以比風吹親，我心諗，著羽絨呀，笨，好在佢地唔係我阿媽咋

食野

平時我係餓先食野既，咁一日3餐係好正常，咁坐月，我都知佢地叫我食乜我都要食，但我確實係食唔到咁多餐，因一早就要抄醒我食飯，都未瞓醒就要食，成日都叫我食食食，個陣真係發哂脾四，因我話我食唔落點食喎，同埋好多野都唔比食(我鐘意既唔比，我唔食的就要食)，乜都要熱食熱飲，遲少少食都比人罵到死，唔食個D(補野)又比人罵喎，真係好慘！

做FACIAL

平時都會做架，但有左BB後，都真係無乜點做過，現在就成日要餵奶而無時間做，試過一次諗住佢瞓得好冧，就自己整下D蜜糖面膜，點知整整下阿B起身喊住要食奶，真係FULL左一陣就即洗

上網、打BLOG、MSN、睇電視、安靜...............

平時可以常做的這些東西，坐月時都完全無時間，因阿B成日都要食，佢瞓時我又瞓，一D精神都無架，所以這些平時做開既活動都要STOP，現在會好少少，不過都係要視乎小公主既情況而定！

雖然好似好多野要守規矩，但做左人地阿媽都係好開心既一件事，因...............每次見到昕晴，當佢對住自己笑既時候，心裡乜都可以忘記哂，我終於感受到，乜野係母愛，其實只係笑一下，都會令到自己好開心，所以，要生仔既話，我覺得一定要有心理準備，尤其坐月個個月，真係乜都無得做，但當捱過左，就乜都得架啦，YEAH！