耶和華是我的牧者，我必不會缺乏。: 6月 2008

2008年6月30日星期一

BB成長 - 第30週

本週身體及胎兒變化情形

目前懷孕 30 週 0 天，預產期是 2008/09/08 ， 69 天後您的小寶貝就出生了。

好開心，今天是照超聲波的日子，終於BB無玩神秘，但其實自己聽到醫生講的也很意外，因好多人話陀囝同陀囡既特徵，同我完全係相反既，我也看過CYAN同EMILY既計算生BABY既圖，我個好友既媽咪所計算的，都係計算得一模一樣，所以我一心都想著自己係會生囝囝既，是也，照到的是..................BB囡

但老實講，真係要等生左出黎先知，因我知超聲波唔係100%準既

而大部份人話：陀囝的話，媽咪會樣衰D、又爆瘡、皮膚又唔靚，又嘔得勁、個肚又尖、肚臍凸........................；相反陀囡的話，媽咪D皮膚又靚、又會精神亦亦、又唔會嘔得咁辛苦，個肚又會圓D、肚臍凹..............................

確實，我既徵狀，真係全部唱反調，唔知係咪初頭嘔得勁，加上身邊既朋友又這又那，聽得太多，我自己都覺自己係生囝架，哈哈哈

但傳統思想既我，其實第一胎係想生囝囝，而第二胎先係囡囡，老公就剛相反，佢話囡囡會乖D嗲D，會帶住細佬，某情況下，都有少少壓力架，雖然99同阿媽係話無乜所謂，反而佢地好開通，話囝囡都一樣，只要健康就得，查實都係既，聖經都有講：兒女是神所賜給我們的產業，我們有的，是神所賜，我應該好好去珍惜同享受，其實之後諗番，囝囡都一樣，只要健康、無大病、乖、孝順，就已經好滿足了，嘻嘻

今次主要係照BB個腎，感恩的係一切正常，生長既SIZE都係一切正常，但原來我不經不覺，重左15.6磅了，我見到照BB個頭時，個WEEKS數係比現在的大左3日，莫非係大頭妹一名？

當醫生說BB個頭已經轉左落去，個一刻我即問，咁我咪隨時生得，有少少嚇親，不過今天個醫生比較COOL，我問既問題，答左等於無答，而我回到公司，即問人，原來BB在6個月時，個頭仔已經係可以轉到下面，其實講座有講過，但個一刻，自己好似發現新大陸咁，乜都好似唔知，哈哈，諗起都感到白痴呀

唔怪得現在BB踢我時，感到好有力，原來係佢對腳仔，簡真係王飛鴻既無影腳呀，有時失驚無神踢你一野，真係令我成個人彈起架

現在除了腰痛、膀胱比BB壓住痛，連橫用力踢時既痛，仲有時會呼吸困難，因佢頂住我個肺同胃，有時諗，仲有個幾2個月BB就出世，到時就可以一身鬆，但又好予盾，好唔捨得BB在自己身體個種奇妙感覺，唔知每個媽咪係咪都有我這種感覺呢？

2008年6月28日星期六

Diamond is Forever Cafe@旺角

店舖：D.I.F.Cafe

地址：旺角通菜街2A-2P鴻光大廈地下F,G,H舖

電話：2385-2899

星期五晚，約了b/s到這間位於旺角既CAFE，我地一行3人，為的是慶祝其中一個弟兄生日，因我們很早便到，一入到去，真的沒太多人，所以我地可自由選擇坐位，我地選了4人坐卡位(可坐4-6人)，之後就點野食了，這間cafe給我的感覺，很光猛很舒服，環境也很乾淨，在旺角鬧巿有這些cafe，確實唔錯，可屬於高級餐廳格局，係個洗手間比較窄左少少，其他一切都令我感到舒服

就是這間了，menu都整得好吸引架

我地3個人，叫左成3個set dinner，每人+15蚊，就可改為酥皮湯，酥皮好好味啊，佢仲跟埋個蒜茸包架，但我影到手震，所以無post出黎

其實叫set時，我自己求其揀左個就去左洗手間，所以，我唔知大家叫的是咩黎架，哈哈哈

這個好似叫三文魚海鮮飯

這個好似叫煙肉闊條麵

這個係我叫的，牛柳粒飯+大蝦天婦羅

杯餐飲都係好大杯架，可以食完慢慢嘆同傾計

我地加加埋埋連加一服務費，成為$344，每人平均百幾蚊，可以坐得咁舒服，同埋三五知己傾下心事，確實係一個好地方，重點係d野食唔差，可以叫好味道架，因我去過其他的樓上cafe，貴到飛起不特止，仲要食唔飽既，相比，這間貴少少，但我地係食唔哂架，下次既話，可以叫散的share黎食都得

不過我建議大家去的時候都係打去book位最好，因我地原先都book左架，只係早到(6:30前已到)無乜人就可以任揀位，我地食完走既時候，8點幾已經排隊排到爆哂，因大家照顧到我係大肚，所以叫我早些回家休息，否則，還可以坐得耐些啊

p.s. Leader謝謝你的照顧，你顧念我的需要，真的很感動啊

2008年6月23日星期一

本週身體及胎兒變化情形

目前懷孕 29 週 0 天，預產期是 2008/09/08 ， 76 天後您的小寶貝就出生了。
妊娠 8 個月（29～32週）
胎兒成長
胎兒身長：約43公分
胎兒體重：約1800公克(約8個葡萄柚的重量)
母體正常變化
子宮底高度：27～32公分
羊水量：約600～800CC
第29～32週　　聽得到外界的聲音，胎位大致固定
1 進入懷孕末期。
2.此時胎兒漸大，已無法在羊水中自由轉動。
3.能眨眼、吸吮拇指，且可伸長手腳和踢動。
4.聽覺功能幾乎完全發展成熟，對外界強烈的聲音會有反應，使身體隨之回應。
5.手指、腳趾甲差不多已經長齊。
6.皮膚紋路減少。
7.骨骼大致發展完成，開始變得堅硬，唯有頭骨仍保持軟而柔韌，以便自產道推擠出。
8.肌肉、神經伸展得更活躍。
9.胎兒的位置大致固定。若胎兒的位置非頭下腳上，可採膝胸臥式進行矯正。
第29～32週
1.28週以後胎盤位置仍在子宮下段，且距離子宮頸口3英吋之內，則確定為前置胎盤。
2.妊娠29週正式進入懷孕末期
3.忙碌勞累時會有輕微的子宮收縮（肚子變硬。
4.皮下組織增加。
5.乳房、下腹部、大腿出現妊娠
6.外陰部的皮膚顏色變深
7.皮膚變得敏感，有時腰部四周會發癢。
8.胸口及胃部因為子宮壓迫而有心悸、噁心、腹脹等現象。
9.腰痠的情形仍持續，容易倦怠。
10.傍晚易有下肢水腫現象。
11.鈣質攝取不足者易抽筋。
12.早晨起床手指發麻。

咁又過左2/3既日子了，時間過得真係快，已經踏進第7個月了，BB就快出世，我會收拾好心情，作個開開心心的媽咪！

今天是揀樓的日子，但我地昨晚作了一個決定，就是放棄是次的揀樓，大家一定會問WHY，等我解釋下先

1. 由於4-5人單位，已經無哂，無論是彩盈、油麗、葵涌、沙田，所有新樓既4-5完全無哂了，3-4人單位，確實太細，所以揀唔落手

2. 就算舊樓，大少少既單位，也是沒有了，因對舊樓也有一定的要求，所以可以揀的不多，昨日返完聚會，也特登到心水既舊樓走一趙，六個小時的不斷搭車、搵樓，看環境中，真的不合心意啊

昨晚做這個決定時，心裡確實十五十六的，因如果唔揀，就要再等下一次，房署話要等1年左右，但揀了，其實只係大現在住的地方大約100呎左右，即係多一間房，其實考慮過好多因數，唔想2-3年又再搬(如到時再生的話)，所以，到最尾同老公決定，不會迫自己選一些自己都覺得麻麻地既屋，現在還是忍耐一下，等下次既機會啦

雖然今次揀唔到，但心裡也很感恩，因我經歷的，確實超過我所求所想，姊妹們的說話，令我很感動及有支持，今天心情不太好的，但感謝主使我身邊有好好的姊妹，雖然不能見面一齊祈禱，但，在MSN中，有姊妹為自己代禱，確實感到很甘甜，同埋不止教會中的B/S，連身邊也有很多朋友關心，所以，真的讓我感受到溫暖啊

2008年6月16日星期一

BB成長 - 第28週

目前懷孕 28 週 0 天，預產期是 2008/09/08 ， 83 天後您的小寶貝就出生了。

其實BB既變化，係差唔多的，唔POST咁多野了，慳番D位，嘻嘻，BB家陣越踢越勁，而踢的次數，比之前更多，就算晚上都不停郁，但好得意既一點，係佢郁完左邊，就會即時掃埋右邊，同埋唔使摸住，坐係度，都見到個肚皮搖擺得好勁，好多姊妹已經摸到了，感覺好得意，佢地摸完會勁興奮，查實連我都興奮埋架，哈哈哈

而公屋個度，按今次既調遷，原來房署係可以比我地揀單位架，但真係只得5分鐘揀，如過左時，就會叫你返出去再排隊，而當天要早半小時到，再抄抵有邊D心水屋比人揀左，到時按番時間，房署D人就會叫你上去，要選好4個單位，按喜歡的由NO.1-NO.4排，到時即看看電腦，心水單位有無人揀到，無的話，咁就係個個單位

其實今個星期既走勢都未知如何，因為每天大約會IN 200人左右，咁即係這個星期，會無左1000個單位，係咩單位現在都未知，但到左這個時間，我心裡都係勁感恩的，因由有左阿B開始，神為我地安排的一切都超過我所求所想，雖然最心水既彩盈村，4-5人單位已經無哂(除了一樓之外)，但，一切都在神手裡，我相信神必定將最合適的給我們

現在有一些方案，大家比比意見呀

1. 如選新樓，我地會揀番九龍區，咁即係得番油麗村，而我地所選的，係會以4-5人單位為主，按彩盈同油麗呎寸來看，3-4人單位大約30.03-30.89平方米不等，而4-5人單位大約39.59-39.77平方米不等，大家既呎數，都差唔多可以相差成100呎，而我地都有考慮過會再生，咁即係5人單位先夠住，所以，揀新樓的話，現在只餘下油麗4-5人單位，因若然考慮3-4人，彩盈都仲有位揀既

2.如選舊樓，我地都偏向想大少少既單位，但大家都知舊樓似終無新樓咁好，最怕係要維修，同埋唔知上一手係邊D人住過，不過房署都好既，有在舊樓側面寫左一些資料，例如會有上一手屋主比人追過債咁既字眼

3.低層因素，因現在我地住的係16樓，99最想係住高過這裡，因太低，佢必定日日哦我老公，同埋都會太嘈，上面D人會拋垃圾及最怕的係有空中飛人，所以一定唔可以揀低層數！

不過到最尾，都要看看個D單位餘下情況如何，先可以再作決定，感恩的，我地係23號早上11點幾揀，咁我地會在星期六或日，抄底仲有邊D樓可以揀，咁排我地前面既人，應該唔會揀哂心水掛，嘻嘻，都叫做有個預算既，現在要考慮的因素都好多，大家比比意見呀！

2008年6月11日星期三

野味一丁@旺角

店舖：野味一丁

地址：九龍旺角洗衣街67號地下

今晚去了旺角食飯，這間舖頭，唔多人，我地七點左右到，一個人都無，係我地食食下，先開始有人，這間係方大哥食午餐時食過的，佢話午餐好抵食，而我地晚餐，價錢及質數都係OK的，加一服務，埋單$119，係服務員比較懶，叫兩聲先應一應，唔會主動幫你加茶！

我的SET DINNER，$38，唔記得好似叫鹽鯖魚定食，好味的

金菇肥牛煱，最好味這個，D汁夠濃，$42

我眼闊肚窄情況下叫的，醬爆雞軟骨，$28，都係好好味既小食之一

但今餐代價都好大，唔知係咪我既玻璃肚又發作，因未有BB前，我一食到少少唔清潔既食物，個肚就會攪同疴，要即找廁所去一去，有時真係好失禮架，我自己試過好多次都係大家都係食同一樣，其他人無事，只有我有事，下下都要找廁所

而今次，就係在回家途中，又FEEL到肚子痛，疴左一次，但個肚都係仲痛，就同老公飛VAN回家，回家後又疴，其實肚痛開始，係好怕我自己既肚痛影響左BB，因BB在我肚痛期間，郁都唔郁，嚇死我，好在回家休息時，同佢再傾下計，佢先開始郁番，咁都無咁驚，不過可能係我自己問題啦，其實這間野都幾好味架，但今次事件，使我唔敢再來食(產後另計)，嘻嘻

2008年6月9日星期一

BB成長- 第27週 + 視察環境

本週身體及胎兒變化情形

目前懷孕 27 週 0 天，預產期是 2008/09/08 ， 90 天後您的小寶貝就出生了。
妊娠 7 個月（25～28週）
胎兒成長
胎兒身長：約35公分
母體正常變化
子宮底高度：約25～27公分
羊水量：約 600～800CC
胎兒體重：約1200公克(約 1串香蕉的重量)
第25～28週　　腦部發育完全，是進行胎教的好時機
1.胎兒頭部比身體大。
2.可看出男、女體重、身長之差異，通常男生比女生大。
3.腦部發育完全，開始有記憶、思考、感情等能力。
4.母親對明暗的感覺胎兒可經由腦部得知。若是母親生活不規律，會影響胎兒的生理時鐘。
5.眼、耳、口等機能全部發育完成。眼睛逐漸可看到光，耳開始可聽到聲音。
6.能睜開眼睛，握緊小手。
7.鼻孔形成。
8.皮膚變薄、呈紅色、有紋路和皺紋產生，皮下脂肪仍少。
9.全身長滿細軟的胎毛。
10.可清楚看見眉毛和睫毛。
11.隨時都有呼吸運動。
12.從超音波可清楚看到心臟有二心房、二心室。
13.若是男胎，此時睪丸已進入陰囊內，但還不完全，女胎則大陰唇的發育尚未充分。
14.胎動更劇烈，但胎位還不固定。
15.過了26週，早產存活率較高。
16.28週以後可更清楚分辨男女。
第25～28週
1.子宮持續變大，腰部負擔增加，容易腰痠。
2.子宮壓迫下肢血流循環，易造成便祕、痔瘡、靜脈曲張。
3.血壓較低者容易頭暈甚或暈倒。
4.胎盤位置較低者，可能會發生陰道出血現象。
5.胎動感受更強烈。

有樣很感恩的事情告訢大家，就係我地申請的公屋調遷已經收到消息，6月23日會到樂富去見主任，應該會個日揀樓，我地已經問過好多人，但每個人既講法都唔同，可能唔同時期申請公屋掛，但我地就會做定事前功夫，挑選好心目中既單位，到時再看點樣選擇，因我地排的次序唔算早，我地個號碼唔知係全港性定全九龍區，所以很多事情也唔到最後都唔知，同埋我知佢地十幾號已經開始見人，如果心水單位比人選左，就無了，請各位為我們繼續祈禱

第一心水，係九龍灣既彩盈村，但個度得192個單位推出，同埋大少少既單位唔多，所以我地怕如太多人揀，我地就無得揀了！

第二心水，係藍田安田村，其實佢係翻新單位，但配套方面就好好，不過只有一個單位啱心水，應該好快比人揀左的！

第三心水，係油塘既油麗村，其實我自己覺得比較遠，但九龍區既新樓，只有這兩個地方，下面係我地今日去視察環境時影的，其實在觀塘搭車，10分鐘內到，我地計過，同現在我地返屋企差唔多，環境及各方面都係好的，但我地當然係九龍灣第一選擇啦！

這張係第27週影的相，個肚就係咁大了，上次產檢時磅重，大約重了10磅左右，現在BB會連環踢，踢既幅度大左好多，佢唔止一下一下咁郁，係好似打橫掃咁，個感覺又唔同左了，好得意，同埋就咁睇自己個肚時，都會睇到佢郁呀，好搞笑的，今個月30號會返去醫院做多次超聲波，希望今次BB都係一切正常啦

2008年6月5日星期四

媽咪及BB用品

星期三同左姊妹Jennifer去左買嬰兒用品，開頭諗住樓上舖會平d，但原來都係差唔多價錢，可能相差都係十元八塊，個度既野都幾齊既，好多樣都有8折，可以唔使週圍行都可以買齊bb要用既野，同埋佢有個list，會知自己有無執漏，我忘了取孕婦個張，只係有bb個張咋，不過我都唔係買左好多bb野，返而就執左孕婦入院既野，同埋sales會介紹同講番d野係點用點用，都幾ok既